الجوهرة المصونة
والدرة المكنونة
زوجتنا فاطنة احمد عبد الغفار
يوصل ويسلم ليها
فى منزلنا الكاين فى جبلاية الفار
نص الرسالة الاولى من حراجى لزوجتة
اما بعد
لذا كنت هاودت كسوفى على التاخير
والهى مكنت حاخط بيدى حرف
سامحينى يا فاطنة ف طولة الغيبة عليكم
وانا خجلان خجلان
واقولك يا زوجتنا انا خجلان منكم من هنا للصبح
شهرين دلوقت
من يوم ما عنيكى يا فاطنة بلت شباك القطر
لسوعتى بدمعك ضهر يدى
لحضتها قلت لك
قبل ما عوصل عتلاقى جوابى
نهنهتى وقلتى لى بعتاب
النبى عارفاك كداب
نساى
وعتنسى اول ماعتنزل فى اسوان
ما عرفت ساعتها يا مرتى اضحك والا ابكى
ما عرفت ساعتها اذا باعوز القطر يقف ولا يولى
حسيت بعنيكى الحيرانة يا فاطنة بتقولى وتسكت وتقلى
حسيت واليد بتخطفها يد الجدعان
بالقلب ف جوفى ما عارف ان كان بردان دفيان
والبت عزيزة والواد عيد
قناديل فى الجوف زى ما بتضوى بتقيد
والقطر اتحرك
وقليبى بيتنقل من يد لايد
والقطر بيصرخ ويدودو
اتدلدلت بوسطى من الشباك
خدى بالك م الولد
راعى عزيزة وعيد
والقطر صرخ ورمح لكانة داس على بصة نار
ولقت الحس قريب قد ما كنتى بعيد
قلبى معاك يا حراجى هناك فى اسوان
ورميت نفسى وسط الجدعان
وبكيت
وبلدنا اللى كنا بنمشيها ف نص نهار
كان القطر ف لحضة فاتها بمشوار
سامحينى يا فاطنة ع التاخير
ولو الورقة يا بت الخال تكفى
لاعبيلك بحر النيل بكفى
كلام
وختاما ليس ختام
بابعت لك
ليكى ولناس الجبلاية ولبتى عزيزة والواد عيد الف سلام
زوجك
لوسطى حراجى
ملحوظة
اكتبى ع المظروف
اسوان
زوجى الغالى
لوسطى حراجى القط
العامل فى السد العالى
رد الرسالة الاولى من الزوجة
زوجى حراجى
فوصلنا خطابك
شمينا فية ريحة الاحباب
ربنا ما يورى حد غياب
مش اول مرة البسطاوى يخطى عتبة الدار؟؟
عمرنا يا حراجى ما جالنا جواب
النبى ساعة مرزوق البسطاوى ما ندة
كدة زى مكون دقت فى حشايا النار
وكأن العمر بيصدق بعد مكان كداب
اتأخرت مسافة كبيرة كبيرة على
عارف فاطنة يا حراجى لا ليها عايل ولا خى
لية تتاخر كدة يا حراجى
طب والنبى وكأن ورقتك دى
اول قنديل يتهز ف جوف الدار
اول ندعة ضو
الدار من غيرك يا بو عزيزة هو
وعزيزة وعيد
من غيرك يا حراجى
زى اليتما فى العيد
الواد على صغرة حاسس بالغربة وبالبعد
ولا عاد حتى بيطلع يلعب فى القمارى مع الولد
اطلع واخش اطلع واخش القاة غيمان
وكانة محروق لة دكان
ويقلى فين يا مة اسوان؟
وابا سابنا لية يا مة؟ ما يمكن زعلان ؟
شهرين يا بخيل؟
ستين شمس وستين ليل
والنبى يا حراجى ما اطول قلبك
لاطع بسنانى الحتة القاسية فية
كل الجبلاية تسلم فردا فرد
م الاج طلب حامد لعيلة بيت على سعد
وانشالله تكون اتعلمت ترد اقوام
وما دمنا احنا راسيين على العنوان
والله ما عنبطل بعتان
مفهوم
اسوان زوجى الغالى
لاوسطى حراجى القط
العامل فى السد العالى
زوجتك
فاطنة احمد عبد الغفار
جبلاية الفار