نسوااااان على نسوااااان!!!!

نسوان على نسوان

السلام عليكم ورحمة الله وبركاته

طبعا معظم اللى شاف عنوان الموضوع استغرب لكن
اللى اغرب من العنوان هو الموضوع نفسه

نسوان على نسوان كاتمين على قلبنا
حكمه وقالوها زمان دول فقر دول عكننه
لازم اقوم بالليل اخنقها واخلص بقى
دى موريانى الويل مكفايه ظلم وشقا
دا حلمنا طول عمرنا ياخدهم ربنا ربنا ربنا

دى كانت كلمات اغنيه سمعتها عن طريق الصدفه الباحته
وهى على نفس لحن الحلم العربى لكن الاستاذ اللى بيغنيها قايم بدور المغنى وفرقة العزف
المهم انى لما سمعت الاغنيه استفربت جدا
وخطر ببالى اسئله كتير
اولها:ياترى الرغبه دى موجوده عند الرجال فقط ولا فى نفس الرغبه عن النسوان زى ما قال المغنى الهمام؟
ولو دى رغبه متبادله بين الطرفين كده يبقى فى سؤال مهم
ماهو السبب فى وجود هذه الرغبه العدوانيه؟
بالتاكيد ان الكلام مش عام
احنا بنتكلم دلوقتى تقريبا عن نص الناس او بمعنى ادق المتزوجين منهم
تفتكروا ممكن الدنيا تمشى وتستمر من غير وجود احد الطرفين؟؟
اكيد لاء والا مكنش ربنا عزوجل قال فى محكم اياته
(وخلقناكم من ذكر وانثى) يعنى مش ذكر بس او انثى بس
وكمان
(وسخرنا لكم)
ليه ماقالش وسخرنا للراجل او وسخرنا للست
اسفه اقصد النسوان
اذا احنا دلوقتى متفقين ان الحياه مشتركه بين الطرفين ولا ولن تستمر فى حالة عدم وجود اى منهم
طيب تيجو نحاول نجاوب على السؤال اللى طرحناه فى الاول
وهو السبب فى وجود الرغبه دى
او ليه الراجل مش بقى طايق الست وعاوز يخلص منها والست كما
وطبعا كلنا بنسمع عن اللى قتل مراته واللى قطعت جوزها
دا غير اننا بنشوف اكيد كلنا مواقف طبيعيه بتعرفنا ده
بس اللى ظاهر ان الراجل عاوز يخلص من الست
عشان عاوزه تعرف هو فين ودايما بيكون ده من باب الحرص والخوف عليه
عشان بتقوله عاوزه فلوس اجيب ده وده
وكمان نفسها تخرج وتشوف الدنيا ولو كل سنه مره
اذا فهى زى الحكمه اللى قالوها زمان
فقر وعكننه
يعنى نفترض مجرد افتراض
ان الزوج مثلا كل فتره مش هنقول كل اسبوع كل شهر او شهرين مره دخل عليها مش هنقول ببوكيه ورد هنقول بورده اكيد هتفرح ولا رايكو انها هتنكد عليه بردوا
لو كل سنه حاول يخرج معاها مره لوحدهم بعيد عن البيت والعيال والمشاكل
واسترجعو مع بعض كل ذكرياتهم الجميله بل ويضيفوا اليها ذكرى اخرى جميله
متهيقلى هتفرح ولا تفتكروا هتنكد عليه بردوا
يعنى بالزمه مش يبقى حرام
انه عاوزها تكون فى البيت طول الوقت مجرد خدامه
وهو بره من الشغل للقهوه لفرح صحبه فلان وطهور بن زميله علان
وفى الاخر يرجع يشخط وينطر( انا تعبان طول النهار مش عاوز اتكلم مع حد)
طيب بالله عليكم
هى تروح فين ولا تكلم مين؟؟؟؟؟؟
مفيش قدامها غير انها تاخد حقها وتنكد عليه
طب وربنا حقها
ولا انتوا رايكوا ايه
انا عارفه انى طولة عليكم بس دا لسه الكلام كتير
عاوزه اسمع رايكم فى الموضوع دا
ويارب ميكونش موضوع تافهه وانا اللى كبرت الحكايه
ويكون يستاهل المناقشه بجد

فى انتظار مشاراكتكم وارآئكم

والله يا زهره الوادي الموضوع ده مهم وكويس انك فتحتيه
بس مش اللوم علي الراجل بس وعلي الست كمان
لان في ستات برده بتزهق جوزها انت كنت فين ؟وبتعمل ايه؟
وووو..................
ومش هنخلص المفروض تكلمه مره واحده ومتلحش عليه
دا بيكون لسه راجع من الشغل وتعبان
ارحموهم شويه!!
تقبلي مروري

بسم الله الرحمن الرحيم ...والصلاه والسلام علي اشرف المرسلين ...اما بعد فانا اشكرك علي هذا الموضوع وارجوا الكل يدخل ويشارك .....اولا الله يقول ....وقارهن في بيوتهن ...وعندما تخرج المراه للعمل فهذا يقل من وقارها وحيائها وقيمتها يعني للاحتكاك بالزميل فلان والمحاليه لرئيس الشغل ان ميعقبهاش او ان رئيس العمل يجرح حيائها ...فانا ضد عمل المرءه تماما ده اول شئ ثاني الاخت بتقول انه يجبلها ورده يخرجها يكلمها كلام جميل انا معك في ذلك ولاكن زي ما انتم عوزين رجل ملاك الرجال بردو عوزين ست ملاك طبعا كلامي واضح ....اخر شئ مع الموضوع محتاج كلام كتير ...البعد عن الدين يعني رجل لايصلي وامراه لاتصلي افتكر مش هيكون فيه سعاده واغرب شئ انهم وهما في الكوشه بيبتدوها بالمعصيه يعني الاغاني شغاله والمخدرات تشرب والست هانم قاعده عرض لشباب وهي متزوكه وقعده علشان الشباب يتفرجوا عليها ويسلام لو تقوم ترقص والعريس قاعد جمب امه او بيرقصه الاتنين ....بالزمه دول عرسان قصدين وجه كريم وعوزين ربنا يكرمهم بالزريه الصالحه الموضوع فعلا محتاج كلام كتير لاكن هكتفي بهذا الحد لحد لما اشوف تعليقات الاخوه الاعضاء ....واخر كلامي ان الحمد لله رب العالمين

السلام عليكم

اولا ياأختى موضوعك فعلا مهم جزاكى الله خيرا

ثانيا أنا أعتقد ان الموضوع دا بجد يعتبر غزو فكر أجنبى أكتر منه شئ راسخ جوانا كمبدأ

يعنى ناس تافهه بتقول كلام اتفهه منها وللاسف الناس بتردد الكلام من غير وعى ومع التكرار بيكون صفة فيهم أو فكرة اقرب للتنفيذ

وطبعا دا كله راجع لقلة الايمان وبعدنا عن الدين لان الدين مش بس صلاة وصوم دا دستور حياة متكامل

يمكن الكلام دا نابع من كتر المشاكل الاسرية والمشاكل دى شئ حتمى مافيش بيت من غير مشاكل لكن الخطأ اننا مش بنعرف نعالجها وكمان بندى نفسنا فرصة اصلا لتواجدها

ودا كله فى النهاية نتيجه للبعد عن الدين

يعنى لو شفنا ازاى كان بيت الرسول صلى الله علية وسلم

ازاى كان بيسابق السيدة عائشه

وجهه بشوش صلى الله علية وسلم

ونشوف برضو النساء المؤمنات ازاى بتعامل ازواجهن

نتعلم منهم ازاى نحل مشاكلنا

فى الحالة دى هنحس فعلا ان العلاقة علاقة تكامل وود ورحمة

مش خناقة وحرب وعند على الفاضى

طبعا الموضوع كبير والكلام مش هيخلص

لكن هكتفى بكدا

وهقول تانى بجد المشكله فى بعدنا عن الدين ال اعتبرناه صوم وصلاة وبس

والجدير بالذكر ان فية حديث عن الرسول بيقول فيما معناه خيركم خيركم لاهله وانا خيركم لاهله

وقال استوصوا بالنساء خيرا

وقال لو امرت بشر يسجد لبشر لامرت المرأة تسجد لزوجها فيما معنى الحديث

السلام عليكم ورحمة الله وبركاته
اولا : بشكر أختى الغالية زهرة الوادى على موضوعها الجميل
وفعلا مشكلة وواقع موجود وبنعيشه وكتير منا خلاص بيختنقوا منه
ثانيا بشكر طبعا كل من ساهم بالرد لكم جميعا كل التحية
وكلمات الأخت اللؤلؤة المكنونة جميل جدا كمان وهو اصل المشكلة وسببها
وأخى أحمد اللى فتح جبهة تانية وكبر المشكلة اكتر ما احنا بنحاول نلمها
واخى رامى اللى رمى قنبله فى وجه المرأة وطار
بشكر الجميع وفعلا أختى زهرة الوادى انا معاكى ان الراجل لا بد ان يكون
رب البيت وحاميه وان يحتضن المرأة ويراعى الله فيها
وكلما كان الراجل حكيما مع زوجته محسننا اليها محبا لها كانت المرأة تبادله نفس الاحساس وتزيد
فالرجل قد تشغله الحياة ويتوه معها ومع مشاكلها أم المرأة يشغلها بيتها وزوجها أكثر من أى شيء أخر
لنبدأ بالاسباب التى تقودنا الى المشكلات
- بعد المرأة عن الدين
- ودنها دائما تخرج لتسمع وتحفظ عن ظهر قلب كل سيء لتبدأ بتنفيذه على الزوج
- يعنى من الاخر بتسمع للناس اكتر ما بتسمع لنفسها
- الماده وقلة أمكانيات الزوج قد تؤدى لدفع المرأة مطالبته بأن يبحث عن حلول حتى ولو ارهق نفسه
لا تتعجلوا ساشرح لكم كل شيء
- تعتبر المرأة ان الراجل هو دائما وابدا ما يكون الزاما عليه ان يقول الكلمات الجميله ويقدم الورود
مع ان الرجل ينتظر ايضا كمة رقيقة وربما ورده جميلة من زوجته ليفرح بها وتنسيه تعبه وجهده ومشقة الايام عليه
فالظروف اصبحت صعبه ولكم ان تتخيلوا كما يعانى الرجل حتى ولو مجرد الفكر فى انه مسئول ومن واجبه والزاما عليه ان
يستطيع ان ينفق على بيته
لماذا تزوجت وانجبت وان لا تستطيع ان تسرف على نفسك فكيف ستنفق على بيتك كا تك خيبه وكلام كتير يحرق الدم
وطبعا ما حرقة الدم يأتى الغضب وكلمة فى كلمة الحريقة تولع والبيت يقيد نار
طب والحل
***************************
احبوا بعضكم بعضا
تسامحا واسمحا للحب ان يعيش بينكم
- انسوا وتناسوا كل سيء ومكروه وتذكرو ما كان وسيكون جميلا بينكم
قفى بجوار زوجك ولا تجعليه هو واحده يحمل فوق ظهره ما لا يستطيع بل عليكى
ان تساعديه وتشجعيه ليس بالمال وليس بعملك لاننى ايضا
لا احب ان تكون زوجتى تعمل لكن يكفى ان يسمع منك التشجيع
وكل كلمات عذبة وجميله تجعل من الصعب سهل ومن العسير امرا يسرا
وانت تذكر دائما ان زوجتك اضعف ما يكون ولا تستحق ان تعاملها تلك المعامله
حتى ولو ضاق بك الحال ودائما كونا مع الله وذكرها وذكريه وذكروا انفسكم
ان من تربى على طاعة الله ومن عود نفسه على الرضى بما قسم الله يكن اسعد الناس
وبصراحة بعد الكلام ده اللى مش عارف خرج منى ازاى بقولكم
نلتقى بعد الفاصل بعيدا عن المشرحة والاكياس

االسلام عليككم ورحمة الله وبركاته
اولا انا احب اعتذر عن متابعتى للموضوع
وبشكر كل الاخوه الاعضاء مرورهم الكريم والفعال مع الموضوع
انا لما فكرت فى الموضوع كنت عارفه ان فى ناس هتبقى
متعصبه ومتحامله على المراه زى الاخ احمد المرصفى كده
والاخ رامى
بس لازم يكون عندنا حياد فى مناقشة اى موضع
زى الاخت لؤاؤه والاخ عماد سليم
اللى حاولوا يناقشوا الموضوع بايجابيه ويوضحوا نقط التقصير سواء من الرجل ام الانثى
وانا ذكرت فى كلامى
ان الجنسين لازم كل منهم يعمل قدر المستطاع لاسعاد الاخر
ونشوف نقط الضعف والاخطاء اللى بنواجهها ونحاول نحلها
مش نقول لاء الست هى وهى
لاء الراجل هو السبب
لازم يعمل ويجيب وينفذ كل طلبات الست
لو كل واحد قدر يخلى سعادته فى سعادة الاخر
اكيد هنقدر على مشاكلنا
اسفه مره تانيه عالتاخير

جزاكم الله خيرا جميعا
وجعل ايامنا كلها سعادة وود