من اطلق الرصاص على محسن بتاع الفول؟؟ لازم تخش تقرا

أنا عايز أعرف بقى فيه كام واحد غَني في مصر؟؟
لا حضرتك.. مش الغِنَى العادي بتاع شغلة محترمة وعربية فيات وشقة تمليك بطلوع الروح.. أنا اقصد الغِنَى الفاحش بتاع القصور والعربيات اللي اربعة في اربعة يساوي ستاشر وحمامات السباحة والبودي جاردز اللى الواحد فيهم عضلة دِراعُه أتخَن من بطني لما آكل مَحشي
*******
كام واحد غَنِى في مصر بقى؟؟
حضرتك السؤال ده منطقي جدا بعد الوجبة الدسمة من شلل الاطفال اللي بنشفها في المسلسلات
المهم خير اللهم اجعله خير المسلسلات كلها عبارة عن عربيات شيروكي وبودي جاردز وحمامات سباحة ومجوهرات ودهب وياقوت واحمدك يارب
والخلافات كلها ازاي الملياردير ده زعَّل الملياردير التاني.. فالملياردير التانى خسَّر الأولاني كام مليار.. وبعدين اتصالحوا في الآخر وكل ملياردير باس الملياردير التاني من بُقُّه والمسلسل خلص زى الفل
والأخت نادية الجندي.. أخت إيه؟؟؟ نينة نادية الجندي صحفية شريفة أي وعهد الله وبتدافع عن الأخلاق وبتجري ورا الخبر والمستندات والصحف كلها واقفة على رِجْل
أيوة حضرتك فين الكلام ده بقى؟؟ صحفية إيه اللي بتلفّ وتتعب وتتنكَّر وتتقتَل وتتخطَف عشان خبر ولاّ قضية فساد؟؟؟
كنتوا اكتبوا في تِتْر المسلسل بقى هذه الأحداث لا تمت للواقع بصلة وأي تشابه في أرض الواقع يبقى انتوا اللي هُبْل
كلنا عارفين ان الصحافة كلها سبُّوبَة.. من أتخَن مؤيِّد لأتخَن مُعارِض.. وعدوّ النهاردة حبيب بُكرة.. مادام مرتب رئيس التحرير المعارض بيعَدِّي 35 ألف جنيه شهرياً ده غير نِسْبته من الإعلانات تبقى الحياة زي الفل ومفيش مشاكل ولا فساد
*******
فكَّروني برضُه بأفلام خالد يوسف الأخيرة.. الأبطال كلهم أغنيا بالصلا ع النبي.. حتى البواب عنده هيونداي على قَدُّه.. ورايحين يتفسحوا في شاليه أي واحد فيهم ما كلهم عندهم شاليهات صلوا ع النبي وبعدين مالقوش حاجة يعملوها ولا يفكروا فيها قالوا يللاّ نلعب ويجا.. طب بالله عليكم حدّ كِدَه يقعد جنب موظف راجع من شغله في المترو .. ويقول له: لو سمحت ممكن نلعب ويجا مع بعضينا؟؟؟ الاحتمال الوحيد انه هيلعب صلَّح على قفاك
ولاّ العلاقات بين الجنسين.. دي بقى عايزة قعدة.. أي حد مذكر بيروح بيت أي حد مؤنث..والحد المؤنث عايش في بيت أي حد مذكر.. وطلع بالشيفروليه واحنا قاعدين.. وحَمِّل ع الشيفروليه واحنا قاعدين
في فيلم وسط البلد محمد نجاتي بيقول لهند صبري تعالي معايا الشقة.. هند صبري بكل براءة وطُهْر قالت له: مفيش مشكلة.. أنا اعرف ان الواحدة تروح شقة الواحد تشرب شاي .. تقعد تتكلم شوية.. بس المشكلة ان الناس ممكن يفهموها غلط
طبْ حدّ يجيب كوباية عصير قصب بقى للراجل اللي اتجنَّن ده يااخوانا اللى هوَّه أنا
يعنى الواحدة تروح شقَّة الواحد تشرب شاي.. اتمَنَع الشاي من البلد ما عدا في شقة المحروس؟؟ وانا اللي عامل فيها مابحبِّش الشاي وعُمري ما شربتُه.. دا انا من بكرة هاشترى مخزون شهر من الشاي من جميع الأنواع
*******
فين المسلسلات بتاعتنا احنا؟؟
احنا مش بنشوف الحاجات اللي بتحصل دى ياجدعان.. حد منكم شاف قصور وبودي جاردز وعربيات زي اللى بيحصل مع ابطال المسلسلات دي؟؟
واحدّ منكم شاف التحرُّر الرهيب ده بين أي بنت وولد في الحياة.. وان البنت تروح له البيت عادي؟؟ وبلاش نتكلم اكتر من كده عشان أنا حاطط وشِّي في الأرض دلوقتي
ولو موجود يبقى كام في المِيَّة من سكان مصر المحروسة؟؟
يعنى مش عيب تبقى كل مسلسلات وأفلام مصر عن ناس احنا مانعرفهمش.. أو حتى عن نسبة لا تتجاوز واحد في المية من سكان بلدنا الحبيبة بتاعة مشربتش من نيلها؟؟
حد هيقول ده حسد؟؟ اقول له أيون حضرتك.. حسد وحقد وغلّ وكُرْه ومقت ونفسَنَة وما خَفِيَ كان أعظم
فين عربية الفول وساندوتش الكبدة اللي برُبْع جنيه وتذكرة المترو والأتوبيسات الخنقة والموظفين الغلابة اللي فيه فتاوي قالت ان يجوز عليهم الزكاة.. والشباب اللي ع القهاوي؟
فين النت اللى عايزين يحدِّدوه زى النسل وفين مشاكل التأمينات والمعاشات؟
فين مشاكل الميَّة والزِّبالة اللي بقت على فواتير الكهربا ومش عارف إيه دخل الزبالة بالكهربا؟؟ جايز عشان اللى مايدفعش فاتورة الزبالة يكهربوه
فين مشكلة السَكَن والشباب اللي اتجوَّز على روحُه والبنات اللي بتشَمْشِم على عريس
*******
مش هيَّه دي مصر؟؟؟
ولاّ مصر شوية صفقات وقصور وعربيات وبنات ستايل في الجامعة بأحدث موبايلات؟؟
ولا يعني ده عشان نفضل نقول ياريتنا زيّهم.. ونفضفض عن نفسنا شوية
زي إعلانات السَمْنة.. الإعلان يجيب ألف صنف فراخ ولحمة وهُبَر هُبَر عشان يقنعك ان السَّمنة هيه السبب.. مع ان المشكلة مش في جَوْدة السَّمنة حضرتك.. المشكلة مين اللي هيجيب لك الأصناف دي؟؟ دي الفرخة عندنا بتتقسم على أربع ليالي.. والشوربة بنشرب فيها أسبوع
وتلاقي الست الوالدة جايبة نفس نوع السَّمنة بس الفرخة مش زى اللي في التليفزيون
الفرخة بتاعتنا م الآخر هيه فرخة لينا بتاعة مسرحية المتزوجون
دي مش حياتنا؟؟
يا جماعة يعني واحد زى اللي قتل أمه من كام شهر عشان مش راضية تدّيله تلاتة جنيه ..لو شاف مسلسل زي بتاع نينة نادية الجندى والعيلة كلها عندها عربيات.. يعمل إيه؟؟؟
طب صحافة إيه ولا طبّ إيه ولا شغلانة إيه عموما اللي تجيب الفلوس دي كلها؟؟؟ طب حضرتك هما خرِّيجين آداب إنجليزى مش تبع الشغلانات دي يعني؟؟
حتى في الروايات البوليسية تلاقي كلمة السرّ دايما حاجة مش بتاعتنا.. يقول لك مثلاً: الثلوج تذوب دائما في الصيف
يردّ عليه: ماعدا في القطب الشمالى
وانا مالي بالقطب الشمالي ولا الجنوبي؟؟
ليه مَتِبْقاش كلمة السر مثلا: موبينيل رخَّصِت كل كروت الشحن
يردّ عليه بفرحة: قُول وعَهد الله
فيغمِز له بعينه ويقول: بيقولوا الكارت بعَشْرة.. بس بيبيعُوه بِحْدَاشَر
*******
يا جماعه مش هى دى مصر

ولا انتو رايكم ايه؟؟؟؟؟؟؟؟؟؟؟

يا ريت اشوف الردود

وتحياتى

MANCHESTER
وبس

مشكور يا مانشستر ع الموضوعات الهادفة دي

ورأي في الافلام والمسلسلات إن أكثرها ليس له علاقة بالواقع والرمزي منها للواقع ليس كامل

وهذا عيب خطير لأن السينما والتلفزيون المفترض أنهم تاريخ ويدل على الحياة في العصر الحالي للعصور القادمة

تقبل مروري

صح

مشكوووووووووووور على مرورك

وبارك الله فيك

الف شكر يا ابو حلمى على الموضوع الجامد

وهى دى مصر

عمار يا مصر

هم عايزين يخلونا نقول ان الناس اللى احنا بنشوفهم لبسين من غير هدوم احسن من الناس اللى بتصلى

اللى بيصلى بيسرق يبقى ارهابى اما اللى لابسه من غير هدوم دى ست محترمه وبتعطف على الناس وبتحج

الف شكر يا مان على الكلام الجامد

بس ايه اخبار محسن بتاع الفول اليومين دول

تقبل مرورى

مشكووووووور يا شهيده الغد على مرورك

وفعلا هو دا اللى بيحصل
انا مش بجيب حاجه من عندى

ومشكور على مرورك

تحياتى لبك

ياللى حاسس انك عماد سمير

الله على الكلام والمنقشات اهى دى مصر بجد
ـــــــــــــــــــــــــــ
تحياتى يابرنس الليالى مش عارف امسك نفسى من الضحك بصراحة
بعد موضوع الاهلى والزمالك بتعك انته وهيثم
خلانى اشوف الموضوع بمنظور كوميدى زى ما اتعودت على قلمك الجامد
فى النقطة دى بس بجد هى دى مصر
ــــــــــــــــــــــــــــــــــــــــــــــ
رائع تعليقات الاعضاء بجد
ليه مَتِبْقاش كلمة السر مثلا: موبينيل رخَّصِت كل كروت الشحن
يردّ عليه بفرحة: قُول وعَهد الله
فيغمِز له بعينه ويقول: بيقولوا الكارت بعَشْرة.. بس بيبيعُوه بِحْدَاشَر
*******
يا جماعه مش هى دى مصر

ليه مَتِبْقاش كلمة السر مثلا: موبينيل رخَّصِت كل كروت الشحن
يردّ عليه بفرحة: قُول وعَهد الله
فيغمِز له بعينه ويقول: بيقولوا الكارت بعَشْرة.. بس بيبيعُوه بِحْدَاشَر
*******

هى دى كلمه السر بعد كدا يا عمده

ههههههههههههههههههههههه
مشكور على مرورك

مشكور يابرنس

لا اله الا الله
انا مش قادر ارد من كتر الضحك
بغض النظر ان الموضوع محزن
بس كلامك نار بتخلى الواحد مبسوط وسعيد
انى بقرا كلامك اللذيذ ده
تسلم ايدك على الموضوع ده

يا سلااااااااااااااااااااااااااام

ربنا يخليك يا استاذ محمد

الحمد لله انى بقدر اوصل الفكره لقلوبكم باقصر الطرق
وهى البسمه

ودعوه منى ليك

يا ريت تخش قسم الفكاهه
وتشوف موضوعاتى
وتقولى رايك

انا منتظر ردك

وتحياااتى ليك

هههههههههههههههههههه. عايزه اقول انى فى منتهى الكابه بس موت من كتر الضحك.........الله عليك ......فعلا هى دى مصر

علي فكرة كله بيقول هي دي مصر ولو بالضحك
بس لا دي مش مصر
ولا عمرها هتكون كده ان شاء الله
وسحابة وتعدي
اه اتكلمنا وضحكنا شوية وزعلنا شوية
طب وبعدين اخرتها ايه حد يقولي يا جماعة
بس برضو ليهم يوم

شكرا ليك يا احمد بس انا بصراحة معرفتش اضحك

شكرا ليك يا احمد بس انا بصراحة معرفتش اضحك
هههههههههههههههههههههههههه

ماشى يا عبده
لوحد غيرك كتبها دى كنت رديت

بس انت لا

وشكرررررن لانا على مرورك

وربنا ما يجيب كئابه ولا حاجه

الف شكرياااااااااااااااابرنس على الحاجات الجميله دى::::::::::شكرين اوووووووووووى على الحاجات الحلوة دى ::::::::::::::::::::::::اعتقد اللى قتل محسن بتاع الفول احد عصابات المافيه geek

::::::::::::::::::مررررررررررسى جدا/ المجهوله

زائر

شكرا يامانشستر على موضوعك الجميل
عرفت تجمع بين الفكاهه والموضوع الهادف
سلامتها........ام محسن
بس صحيح يامانشستر مين محسن بتاع الفول ده؟؟؟؟؟؟؟؟؟؟؟؟

مشكووووووره يا مجهوله على مرورك

ومحسن بتاع الفول دا يا صقر مرصفا واحد صحبى من ايام التوجيهيه

بس هتشوفوه فى المنتدى كتير قوى