حمار سياسة ...
حاول تقولي ..
أنا ليه ما بفهمش السياسة ؟؟
مع انى باعرف الاقتصاد ..
والاقتراض ..
والافتراض ..
وكتير باقابل الامتعاض ..
واعامله فى غاية الكياسة ..
لكنى ما فهمش السياسه !!!
واعرف كمان الامتنان ...
والافتتان ..
والامتهان ..
والكلمه لو قالها اللسان
يخفى صاحبها ولا يبان !!
وكلاب أساتذة فـ الحراسة
لكنى مافهمشى السياسة ....
وأعرف كمان المألسة
والتستسة ....والوسوسة
والحليطة ... واللحوسة
مهارات ما تحتجش لدراسة
أنا ليه مابفهمش السياسة !!
وكمان ساعات افهم حاجات
ورا الحاجات ..
وساعات كلام ورا السكات ..
وساعات بغمزة من عيون
تحصل حاجات ....
من بعدها تنسى اللى فات !!
وتبقى فى غاية الدماثة !!
لكنى ما فهمشى السياسة
واعرف كمان الخصخصة ..
والقصقصة ..
والمصمصة ..
وان العصا لمن عصى
واللى زودها ..اتخصى
عشان يبطل الافتكاسة
مع انى ما فهمش السياسة
وساعات بيبقى ف الحكاية
اخوانجى ..ولا تبع (كفاية) ..
يبيع صحابه فـ المظاهرة
ويسارى جدا فرش ملاية
بخطبة فى غاية الحماسة !!
لكنى مافهمش السياسة ..
واسمع كتير على المجالس ..
والأبالس !! ...
وفلان يقولوا عليه موالس ..
وسمعة زى الزفت خالص ..
ومركزه فـ غاية الحساسة !!!
أنا ليه ما بافهمش السياسة ؟؟
طوابير كتير ع الأرغفة ..!!
فوق الارصفة ..!!
وخبز تانى فى مُولات مِتكيفة
وايدين بتلمع م الكريم ..
وناس ايدينها مأشِفة !!
وحكاوي فى غاية الخساسة
أنا ليه ما بفهمش السياسة ..!!
حاول تقولي ........
أنا ليه مابفهمش السياسة ؟؟
انت نمت ؟؟
ولا انت مش فاهم سياسة !!
م ن ق