الكلام إللي فات كان عن قيس وليلى بتوع زمان….ياترى بقى لو "قيس وليلى" كانوا عايشين دلوقت... كان حيبقى إيه حالهم....؟
تعالوا نشوف........
وقيس خارج مع أصحابه ياخد لفه في أحد المولات يلفت انتباهه صوت ضحكة مجلجلة هزت المول كله وخلت كل واحد يرمي إللي في إيده ويلتفت في إتجاه الضحكة وفي اللحظة دي تلتقى عيون قيس بعيون ليلى للمرة الأولى...
قيس بدأ يكلم نفسه... "إيه الجمال ده إيه العيون دي أول مرة أشوف عنين من غير عدسات ولا رموش صناعية.. هو برضه الواحد مش ضامن.. بس أنا حاسس كده إن عنيها مختلفة"
تنتهي فترة السكون وكل واحد راح يشوف إللي وراه وأخينا قيس لسه متنح...
تاخد ليلي بالها وتروح لقيس وتقول له في منتهى الرقه: "في حاجة يا كابتن إيه بتشبه...إيه... شبه المدام واللا حاجة" يرد قيس في منتهى الخجل: "إيه يا أمورة حد كلمك واللا أنت جايه ترمي بلاكي علىّ.."
ويستمر الحوار بينهم بمنتهى الرقة وينتهي ليس في قسم البوليس كما قد يتخيل البعض لكن ينتهى وقد تبادلوا سوياً نمر الموبايلات والإيميلات... عدت أيام وشهور والاتصال جاري بين قيس وليلي لغاية ما في ليلة..... الساعة 3 صباحاً: صوت نغمات رقيقة تنتزع ليلى من أمام شاشة التشات "شبرا..... وبنات شبرا... حلمية... والحيتية" وبعد فترة تكتشف إنها النغمة الجديدة إللي اختارها قيس مخصوص ليها... ليلى: " ألو ..أيوه...عايز إيه على المسا" قيس: "يا بنتي لمي لسانك شوية إتعلمي مني حاجة" ليلى: حاضر ياسيدي قيس: أيوه كده علشان أحبك ليلى: حتحبني غصب عنك وإن مكنش عجبك في داهية يلم قيس الدور بسرعة: "لا ياحبيبتي إزاي عجبني... المهم بس علشان الكارت قرب يخلص أنا طرقعت في دماغى فكرة روشة مووت حتقضى على حالة الملل إللي حاسس بيها بقالي مده" ليلى (باهتمام شديد):"اتحفني" قيس: إيه رأيك نتجوز ..؟ ليلى: يانهارك ..... إنت عارف إنى أصاحب آه بس جواز لأ انا لسه صغيرة على الكلام الفارغ ده!! ( تنهى ليلى الحوار وهي بتبعت أخر رسالة على برنامج الشات واللي بتأكد فيه جدول مواعيد تاني يوم).. قيس: يا بنتي إسمعي بس دي فكرة جديدة... طب جيبي لي حد من الشلة فكر فيها.. ليلى بعد تفكير عميق: مفيش قيس: تخيلي كده أجى لباباكي وأتقدم لك ويوافق ونعمل فرح ونعزم أصحابنا ونجيب D.j يكسر الدنيا ونسافر بره بس أهم حاجة يراعي ظروفي وإني لسه في بداية حياتي ويجيب لي شقة ويشترى العفش و..... و..... و...." ليلى سرحت في كلام وبدأت تقلبه في دماغها: " والله دي ممكن تكون فرصة قيس ولد روش ومش حيوجع دماغي يقول لي رايحة فين وجاية منين زي أهلي ما بيعملوا وبعدين أهو الواحد يجرب ولو ضايقني أخلعه".. وفعلاً أخدت ليلى قرار نهائي: "خلاص يا قيس أنا موافقة أول ما بابا يجي من السفر تعالى قابله.."
عاد والد ليلى من السفر وكانت ليلى في إنتظاره وهى حتطير من الفرحة "بابا أنا جالي عريس وعاجبني ولازم توافق عليه وأعمل حسابك هو لسه في أول حياته يعني حتساعده وحتجيب لنا الشقة ومش حتاخد منه مهر ولا شبكة ولا.... ولا... ولا...."
أي إنسان طبيعي سيتوقع أن يرفض والد ليلى كل هذا الكلام ولكن ما حدث أيضاً كان مختلف تماماً فقد وافق والد ليلى على كل هذه المطالب في سبيل التخلص من ليلى ومشاكلها التي لاتنتهى – حتقولوا وهان عليه بنته- اعتقد والد ليلى انه لا يمكن أن يتهم بالتقصير أمام تلبيته لجميع طلبات ليلى...
و اتحدد ميعاد مقابلة قيس ووالد ليلى وعدت المقابلة على خير رغم المشكلة البسيطة اللي حصلت بسبب اصرار والد ليلى على الخطوبة واللي طالع عليه عمال يقول "يا ابني الخطوبة مهمه علشان تدرسوا أخلاق بعض" وقيس يقول "يا عمي أخلاق إيه وكلام فارغ إيه دي كفاية الشقة... قصدي سمعة ليلى" والد ليلى: "برضه يا ابني الخطوبة فرصة للتعارف" قيس بمنتهى الأدب: "يا شيخ بقى زهقتني دا أنا عارفها أكتر منك وعلشان نجيب من الآخر احنا بقالنا أكتر من 6 شهور بنتقابل وخلص بقى أحسن أرجع في كلامي" والد ليلى: "لا ... لا يابني ترجع في كلامك ليه دا أنا قلبي انفتح لك من ساعة ما أشوفك وكمان بيني وبينك الخطوبة بتعمل خلافات ومشاكل مش كده واللا إيه...؟ خلاص يابني بكره ان شاء الله اسجل لك الشقة اللي في عمارة الزمالك باسمك وبعد بكره إن شاء الله حاديك شيك تصرفه وتجيب إنت وليلى العفش اللي يعجبكم بس أهم حاجة إن الفرح يكون الأسبوع اللي جاي"
نفذ والد ليلى وعوده بالحرف الواحد وجه يوم الفرح...... فرح أسطورى معزوم فيه كبارات البلد وبيغني فيه أشهر المطربين... وليلى لابسه فستان جاى مخصوص باسمها من باريس وطايرة من السعادة لكن فيه شئ كان بيقلقها....قيس اتأخر وبعد محاولات كتيرة فاشلة للاتصال به على الموبايل اتصلت بيها نمرة غريبة ولما رددت لقت قيس: قيس: "ليلى" ليلى: "قيس إنت فين يا مصيبة قلقتني عليك" قيس: "لمي لسانك واسمعى الكلمتين دول.. أنا فضلت أفكر امبارح طول الليل ولقتني لسه صغير على المسئولية بس والله يا ليلى أنا فعلاً حبيتك بس أعمل إيه مش قادر أكمل معاكي" ليلى:"إنت بتقول إيه...؟ طب والفرح والناس والشقة والعفش. قيس: " مش عارف أنا فعلاً حاسس بيكي بس ياريت نبقى أصحاب أنا مش عايز اظلمك معايا وبعدين لو على المعازيم باباكي يعتذر لهم أما الشقة والعفش فأنا ححتفظ بيهم علشان يفكروني بالأيام الجميلة إللى كانت بنا... سمحيني يا ليلى... وعلى فكرة ياريت متحوليش تتصلي بى علشان متعذبنيش وحاولي تنسيني لكن أنا مش ممكن أنساكي"
نزلت كلمات قيس كالصاعقة.. ليلى:"أنا..أنا يعمل فيا كده هو فاكر نفسه مين...بس أنا ولايهمني في داهية.. أنا حاقوم أحضر الفرح وكأن مفيش حاجة حصلت إيه يعني إن العريس مش موجود دا هو حته زي قلته...و..." "ليييييييييييييييييييييلى فين سي قيس بتاعك إتأخر ليه الباشا ولا عايزني أبعت له هليكوبتر يجيبه"...طبعاً دا كان صوت والد ليلى إللي خلاص فاض بيه ليلى: "فيه إيه بتزعق كده ليه... قيس خلاص بح مش حييجي... استريحت" والد ليلى: "إيه إللي انت بتقوليه ده انت عارفة الكلام ده معناه إيه...؟" ليلى: "إيه يعني علشان الشقة مش مشكلة يولع بيها إن شاء الله ده كفاية إنه خسرني... وبعدين بلاش وجع دماغ بقى كبَّر دماغك وتعالى ننزل للناس نقضى ليلة حلوة وهو تغيير" والد ليلى:"إنت هبلة ولا بتستهبلي.. أنا عامل حسابي اني أخلص منك النهاردة" ليلى: "يعني إيه يعني" والد ليلى: "يعني حتتجوزي يعني حتتجوزي والنهاردة" ليلى: "إيدي على كتفك ياولدي بس العريس بخ... طار.. أعملك إيه" والد ليلى:"عندي البديل.."لميع بيه" راجل محترم اتكلم عليكي زمان وكنت برفض على أمل إنك تعقلي بس شكلك كده مش حتجيبيها لبر..." ليلى: "لأ "لميع بيه" لأ ده عدى الستين بعد المائة مش حتجوزه ومش حتجوز خالص ولو صممت حنتحر" والد ليلى: "بصي أنا مش بتهدد وحتتجوزي "لميع بيه" وأعلى ما في خيلك اركبيه"
وبكده تنتهي قصة "قيس وليلى" في العصر الحديث وقد انتهى الحال بليلى محبوسة في منزل رجل يكبرها بملايين السنين.... وبقيس في مستشفى الأمراض العقلية ولكن ليس بسبب جنونه في حب ليلى ولكن لجنونه بعد أن ضحكت عليه إحداهن وخدت إللي وراه وإللى قدامه.. ههههههههههههههههههههههه ايه رأيكم فى القصه مع تحياتى صاحب الليل او الحزين
EL!@MEER .::®EL!@MEE::.
عدد الرسائل : 1704 العمر : 37 Personalized field : وســـــــام : وســـــام جديد : تاريخ التسجيل : 24/04/2008
اشكركم يا جماعه على مروركم على فكره يا انسه ملك ممكن قيس يكمل مع ليلى2008 بنسبه واحد فى المئه وشكراا يا ابو جلال على الكلام الجميل بتاعك وبطل مجاملات بقى اشكرك يا انسه ليالى على كلامك الرائع والجميل اشكرك يا ميدو على مرورك مع تحياتى صاحب الليل او الحزين
EL!@MEER .::®EL!@MEE::.
عدد الرسائل : 1704 العمر : 37 Personalized field : وســـــــام : وســـــام جديد : تاريخ التسجيل : 24/04/2008
السبت 07 يونيو 2008, 20:05
