ابعد عنها؟ ... فى حالة واحدة .... لو معايا تيجيبولى
الحسين والسيدة والموسكى ........... وخان الخليلى
***********
وصنايعية بتدقدق وتقول مواويـــــــــــــــــــــــــــــــل
تعمل لوحة أو تعمل للجامع قناديـــــــــــــــــــــــــــل
**********
و أوعوا تنسوا قهوة الفيشــــــــــــــــــــــــــــاوى ...
اصـــــــــــــــــل أنا غاوى اسمع حكاوى وكمان غناوى
***********
وشاى خمسينة وكباية ميه فيها عودين نعناع
ومغنى قاعد عالناصية وبيعزف عالعود أوجاع
***********
ومطعم بيبيع كباب وفشة و فتة كــــــــــــــــــــــوارع
وزحمة وهيصة واللى عليه الدور واقف فى الشارع
***********
وعم حسين بياع الترمس على الكورنــــــــــــــــيش ....
والواد سيد راكب العجلة وعلي دماغه قفص العيش ...
وجنب الجامع منصوب حلقة مليانة بذكر الدراويش
وقهوة صغيرة فى الزاوية وعلى حيطانها صورة لناس بمنشة ولابسين طرابيـش
وحمادة ابن أم حسين شايل الشنطة ولابس الميرى ورايح الجيش
بيصبح على أهل الحتة وبيدعى له عم عليش
شاى بوسطة يا واد لحمادة... يدوم العز ياعم جاويش
اقعد حبة ..استنى شوية ...طيب حستناك المرة الجاية...
بس اوعى تطنش ياحمادة ومتجيـــــــــــــــــــــــش
***********
هاتولى الهرم ويايا .... هاتولى النيــــــــــــــــل
هاتولى القعدة واللمة وقلوب صافية لنص الليل
************
هاتولى رمضان بالزينة والفرحة والفوانيـــــــــس
هاتولى عيال ماشية تغنى ولمة العادة فى قراطيس
*************
وصوت الراديو بيلالى اهو جه يـــــــــــــــــا ولاد
يجعل أيامكو ولياليكو كلها أعيـــــــــــــــــــــــــــاد
كيلو كنافة وحط قطايف واتوصى شوية يا عم فؤاد
ومشينى قوام وحياتك لحسن عازم خال لــــــــــولاد
مهو رمضان بيحب اللمة وادعى معايا علينا ينعـــاد
ومسحراتى عالطبلة يغنى اصحى يانايم
اصحى وقول نويت من بدرى صايــــم
نقوم نتلم ونتسحر ونوحد الدايــــــــــم
**************
هاتولى ثومة وهى تغنى يا ليلة العيد
واصحى والاقى تحت سريرى لبس جديد
ونروح نصلى انا واخويا وأبويا وعمى سعيد
| 
الإثنين 12 مايو 2008, 22:08
